Ridimensionohet aleanca e re në Ballkan, Shqipëri-Turqi-Kosovë, opinionistët kundër një neo-otomanizmi të ri
Analiza & Komente | Zef Prenka | 24.10.13 | 14:28
Një aleancë e re e fuqishme po konturohet dhe ridimensionohet në Ballkan, si kundërpeshë ndaj serbëve dhe grekëve, të mbështetur nga linja ruse. Shqipëria, Kosova dhe Turqia, pavarësisht luftërave dhe divergjencave në të kaluarën, kanë vendosur të ridimensionojnë rolin e tyre në Ballkan. Tre kryeministrat e Shqipërisë, Kosovës dhe Turqisë janë shfaqur dje së bashku në ceremoninë e inaugurimit të Terminalit të ri të Aeroportit Ndërkombëtar të Prishtinës “Adem Jashari”. Po më shumë se një takim për terminalin e ri, shfaqja së bashku e tre kryeministrave është një lëvizje politike dhe simbolike, e cila nënkupton një aleancë të re që pritet të dominojë Ballkanin. Afrimi i Turqisë me Shqipërinë dhe Kosovën, duket se ka shqetësuar dhe trembur Serbinë dhe Greqinë, dy shtete që kanë përvetësuar pjesën më të madhe të trojeve shqiptare pas Konferencës famëkeqe të Londrës në vitin 1913. Por prezenca dhe influenca e shtuar e Turqisë në Shqipëri dhe Kosovë është lexuar nga politikanë dhe analistë shqiptarë edhe si një “pushtim” i ri turk dhe si një lëvizje e ekzagjeruar. Kjo lëvizje po interpretohet si një neo-otomanizëm i ri, ndërsa Rama është kritikuar se po e integron vendin në aleancën e Anadollit. Aleanca e re është parë me skepticizëm nga shumë politikanë në Shqipëri, por është kritikuar ashpër nga analistët kosovarë. Kundër deklaratave dhe strategjisë së Erdogan janë shprehur Gafurr Adili, Alma Lama, Frank Shkreli
Pasha: Kosova nuk është Turqi
Koloneli në rezervë, Myslim Pasha, reagoi pas deklaratës së kryeministrit të Turqisë, Rexhep Taip Erdogan, i cili tha se Kosova është Turqi dhe Turqia është Kosovë. Sipas Pashaj, kjo deklaratë krijon një pakuptimësi. “Turqia nuk është Kosovë ashtu si dhe Kosova nuk është Turqi. Në fasadën e saj, kjo deklaratë e kryeministri turk, krijon një pakuptimësi, por në thelbin e saj unë kuptoj që ata kanë një simpati të veçantë për Kosovën dhe që do ta ndihmojnë”, u shpreh Pasha. Më tej, koloneli në rezervë, lidhur me konceptin “vëlla”, të treshes Rama-Thaçi-Erdogan, theksoi se tingëllon si e pakuptimtë. Sipas Pashës, tre kryeministrat nuk janë nga e njëjta rrënjë. “Kur dëgjova fjalën vëlla që tre kryeministrat Rama-Thaçi-Erdogan, i thoshin njëri-tjetrit më dukej e pakuptimtë sepse ne nuk jemi nga e njëjta rrënjë. Po kështu, pankartat e shkruara në Turqisht mu dukën një paradoks. Pse mos t’i themi vëlla maqedonasve dhe malazezëve?”, u shpreh Pashaj.
Alma Lama kritikon axhendën e Erdogan
Deputetja e pavarur e Kosovës, Alma Lama, ka kritikuar kryeministrin turk, Rexhep Tip Erdogan, për një axhendë fetarë në Kosovë. “Ne nuk kemi asnjë të drejtë t’ju gjykojmë ju dhe partinë tuaj për agjendën islamike të cilën e keni proklamuar hapur, i takon popullit të Turqisë ta bëjë këtë vlerësim, mirëpo unë personalisht dhe si unë ka me mijëra shqiptarë, nuk mund të heshtnim nëse këtë agjendë ju apo kushdo tjetër do të përpiqet ta shtrijë edhe në Kosovë. Unë i kam parë shenjat, diçka e tillë po ndodh, islami politik ka nxjerrë kokën edhe në Kosovë dhe po bëhet gjithnjë e më agresiv”, tha ajo.
LDK: Thaçi përdori Erdoganin për fushatë
Lidhja Demokratike e Kosovës ka pohuar dje se kryeministri i Republikës së Kosovës, Hashim Thaçi, në kundërshtim me ligjet dhe me normat e sjelljes në fushatën zgjedhore, madje në kundërshtim me përcaktimet kushtetuese që lidhen me funksionin e kryeministrit dhe të Qeverisë, e përdori vizitën e kryeministrit turk, Recep Tayyip Erdogan, për të bërë fushatë në dobi të Partisë Demokratike të Kosovës dhe, në mënyrë të veçantë, në dobi të kandidatit të PDK-së për kryetar të Prizrenit, Ramadan Muja, thuhet në një reagim të Lidhjes Demokratike të Kosovës.
Kolec Traboini: Turqia ka shtypur shqiptarët
Opinionisti Kolec Traboini ka deklaruar dje se turqit nuk janë vëllezërit e shqiptarëve. “Nuk më bashkon asgjë me turqit. Nuk i kam vëllezër me shkakun se gjyshët e stërgjyshët e mia nuk kane bërë seks me jeniçerët e Anadollit. Por unë kam vëllezër shqiptarët e Turqisë të cilët mjerisht nuk kane asnjë të drejtë megjithëse janë mbi 5 milionë shqiptarë në Turqi. Sa kohë që nuk u japin të drejtat që u takojnë në bazë të konventave ndërkombëtare shqiptarëve të Turqisë, unë nuk dua t’i shoh me sy qeveritarët e Turqisë, vafshin shqip vafshin në djall”, tha ai.
Arbana Xharra: Thaçi në gjunjë para Erdogan
Analistja Arbana Xharra, ka pohuar dje se Hashim Thaçi është gjunjëzuar para kryeministrit turk. “Këta burracakë, do të duhej të dilnin në protestë, për të kërkuar të drejta për qindra mijëra shqiptarë të shpërngulur në Turqi, pas marrëveshjes me Turqinë të cilët kanë humbur pothuaj plotësisht identitetin. Sa për shaminë, e morën përgjigjen edhe nga presidentja e Kosovës, Atifete Jahjaga. Ajo këtë herë foli qartë që ta dëgjojnë edhe veshët e Erdoganit; “Bartja e shamive nuk lejohet dhe nuk do të lejohet sepse Republika e Kosovës është shtet laik”, tha ajo. Adriatik Doçi
Nga FRANK SHKRELI
Gjatë disa viteve të fundit Turqia ka ndërmarrë një fushatë, që disa e quajnë si një ofensivë të gjithanshme, diplomatike, politike, shoqërore dhe fetaro-kuturore në Ballkanin perëndimor, kryesisht e përqëndruar në vendet me shumicë myslimane, si Shqipëria, Kosova dhe Bosna-Hercegovina. Siç duket në frymën e kësaj fushate diplomatike, Kryeministri turk Rexhep Taip Erdogan do të vizitojë Kosovën të Mërkurën, ë 23 tetor. Mediat e Prishtinës njoftojnë se zyrtarisht udhëheqsi turk po viziton Kosovën për të inauguruar terminalin e ri të aeroportit, „Adem Jashari“ në kryeqytetin e Kosovës, por sipas të njëjtave burime, Z. Erdogan do të vizitojë edhe Prizrenin, kryeqytetin e të gjithë shqiptarëve, i shoqëruar nga Kryeministri i Kosovës, Z. Hashim Thaçi. Dhe ajo që e bën këtë vizitë në Prizren edhe më interesante, është fakti se Kryeministrit të Turqisë dhe atij të Kosovës do t’i bashkohet edhe Kryeministri i Shqipërisë, Z. Edi Rama — e gjithë këjo gjatë një fushate elektorale për zgjedhjet vendore në Kosovë — gjë që disa analistë e kanë cilësuar si një përpjekje për të influencuar zgjedhjet në favor të partisë në pushtet dhe për më tepër si një ndërhyrje në punët e mbrendshme të Kosovës.
Fatkeqsisht, influencat e huaja ashtu si edhe në të kaluarën, po gjëjnë edhe sot mbështetje në trojet shqiptare, për arsye të përkohëshme politike, ekonomike e të tjera. Duket se asgjë nuk është mësuar nga historia. Fushata diplomatike turke e viteve të fundit për të ushtruar një influencë dominuese, sidomos në vendet me shumicë myslimane si Shqipëria dhe Kosova po bëhet me një zhurmë të madhe dhe në një mënyrë arrogante sa që kërkohet edhe rishqyrtimi i historisë së okupimit 5-shekullorë të trojeve të kombit shqiptar nga otomanët. Ndërkohë, Rusia një perandori tjetër të cilës shqiptarët gjithmonë ia kanë pa sherrin, influenca politike dhe financiare e së cilës gjithnjë vjen e shtohet në Ballkanin Perëndimor, ka thënë se çdo përkrahje për pavarësinë e Kosovës është ilegale dhe imorale, ndërkohë që sa për sy e faqe zhvillon bisedime me Prishtinën në Bruksel. Në këtë boshllëk të një politike dhe diplomacie të vendosur dhe të bashkrenduar mirë ndaj interesave kombëtare nga Tirana dhe Prishtina — Kryeministri serb Daçiq — deklaroi ditët e fundit se është duke menduar që në vend të bisedimeve të Brukselit — dialogun ta vazhdojë me Kryeministrin e ri të Shqipërisë, Z. Rama. Kemi të bëjmë gjithnjë me arrogancën e atyre që për shekuj donin të zhduknin racën shqiptare nga Ballkani. Në prak të vizitës në Kosovë, Kryeministri turk Erdogan deklaron se,“Turqia dhe Kosova kanë marrëdhënie miqësore dhe vëllazërore që rrjedhin nga thellësitë e historisë, por është e vogël dhe nuk ka të drejtë të flas kundër Islamit,” ka thënë Erdogan për televizionin turk TRT.
Kosova, është tepër e vogël për të folur kundër Islamit! Se kush në Kosovë është duke folur kundër Islamit, veç ai e di, por në të vërtetë është duke thënë se Kosova është tepër e vogël për çdo gjë dhe si e tillë është nën mëshirën e tij. Por megjithkëtë, shqiptarët në përgjithësi dhe shqiptarët e Kosovës në veçanti, ashtu siç i shkruan Z. Erdogan në prak të vizitës së tij në Kosovë, edhe deputetja e pavarur e Kosovës, Alma Lama, „Ne në Kosovë, por shqiptarët edhe më gjerë jemi shumë të interesuar të kemi raporte të mira me shtetin e sotëm turk pavarësisht nga e shkuara jonë e hidhur. Krijimi i raporteve të mira do të thotë në radhë të parë respekt reciprok, do të thotë respektim i kulturës dhe traditës së tjetrit. Ne, si ish-pjesë e perandorisë turke, të pushtuar prej saj jo vetëm politikisht por edhe kulturalisht e fetarisht, para një shekulli bëmë përpjekje të jashtëzakonshme si komb për të rilindur vetveten. Ia dolëm. Sfida numër një për ne ishte pikërisht feja. Vendosëm që asaj të mos i jepnim rëndësi të dorës së parë, por kombi të ishte formula jonë e ekzistencës. U përcaktuam për këtë dhe ecëm përpara. E kundërta do të na kishte fundosur. Ashtu sikurse mund të na fundosë tani, nëse ne nuk tregohemi të vëmendshëm“, i shkruan deputetja e Kosovës Alma Lama, Kryeminsitrit turk në vigjiljen e vizitës së tij në Kosovë.
Edhe udhëheqsi serb Daçiq, ndërsa sa për sy e faqe zhvillon bisedime në Bruksel me Kryeministrin e Kosovës, në një ëndërr teatrale të tijën, ai nënçmon udhëheqsit shqiptarë të Kosovës duke deklaruar se për fatin e Kosovës, ose më mirë të themi, për ndarjen e Kosovës, tani ai dëshiron të flasë me Tiranën zyrtare, pikërisht me Kryeministrin e ri, Z. Rama. Hajde dreq e merre vesh këtë punë. Edhe Greqia nga jugu i kufijve të kombit, vazhdon me politikën e saj të pandërprerë anti-shqiptare. Asnjë përgjigje as deklaratë zyrtare as nga Prishtina as nga Tirana! Quo vadis, Kombi Shqiptar?
Shqiptarët gjatë gjithë historisë së tyre nuk kanë sulmuar askënd as nuk kanë pretenduar toka e territore të tjerëve, nuk kanë imponuar fenë dhe as nuk gjykojnë historinë e të tjerve. Shqiptarët megjithë vuajtjet e tyre nga pushtime të ndryshme nga fqinjtë dhe mbështetsit e tyre, sot më shumë se kurrë janë tepër të interesuar për marrëdhënje të mira me të gjitha vendet e rajonit, përfshirë Turqinë, Serbinë dhe Greqinë. Por siç thotë edhe deputetja e Kosovës Alma Lama në letrën drejtuar Z. Erdogan, një gjë e tillë kërkon mirëkuptim të dyanshëm. „Ne nuk mund t’ju akuzojmë ju për atë që kanë bërë paraardhësit tuaj“ thotë deputetja shqiptare, „por në momentin që na kërkoni që ne të ndërrojmë historinë, që të zezës t’i themi e bardhë, të përgjakshmes lulëzim, në momentin pra kur ju nuk distancoheni nga prapësitë e paraardhësve tuaj, por përkundrazi na kërkoni që edhe ne t’i shohim me sytë tuaj, atëherë mos pritni prej nesh mirëkuptim.“
Duke shprehur ato që unë mendoj se janë ndjenja të shumicës së shqiptarëve kudo, deputetja e Kuvendit të Kosovës, në letrën e saj drejtuar Kryeminstrit Erdogan thotë gjithashtu se, „Ne si komb kemi luftuar shumë hegjemoninë e të tjerëve, dhe tani që po shijojmë lirinë, kurrsesi s’mund të pranojmë që dikush, sado i fuqishëm, të na e shkruajë historinë sipas qejfit të vet. Asnjë shtet perëndimor, as ata që na çliruan nga pushtuesi tjetër Serbia, nuk na ka ardhur me një kërkesë të tillë primitive. Primitive, pasi së pari historinë e shkruajnë historianët, jo politikanët, aq më tepër politikanët e vendeve ish-pushtuese; dhe së dyti, sepse bie tërësisht ndesh me fondamentin tonë, iluminizmin dhe të vërtetat që burojnë nën dritën e tij“, shkruan deputetja e pavarur në Kuvendin e Kosovës.
Sa ironik është fakti që Kryeministri i Turqisë, pasardhëse e Perandorisë Otomane, Z. Rexhep Taip Erdogan kërkon të shkojë në Prizren së bashku me dy kryeministrat shqiptarë, aty në Prizrenin e Abdyl Frashërit, aty në zemrën dhe në shpirtin e Lidhjes së Prizrenit, aty ku shqiptarët e të gjitha krahinave i deklaruan botës së ka Shqiptarë dhe se ka Shqipëri, aty ku u dha kushtërimi për bashkim qëllimi e ideje. Sado tërheqse që të jenë premtimet për ndihma financiare dhe investimet nga të huajt, siç ka thënë edhe Midhat Frashëri me një rast, “Përpjekja për Atdhe nuk është si puna e ryshveteve, që njeriu bën hesap a del a s’del, behet hesap a fitohet a humbet — por jo në çështjen kombëtare.”
Në takimin e Prizrenit me kryeministrin turk, kryeministrat shqiptarë duhet të jenë të vetdijshëm dhe ndërgjegjës ndaj parimeve të Lidhjes Shqiptare të Prizrenit që shqiptarët pas pesë shekuj robërie, më fund të vendosnin vet fatin e tyre, që të shpëtonin Shqipërinë dhe Shqiptarët. Obligimet e tyre morale dhe politike ndaj këtyre parimeve si përfaqsues të kombit shqiptar sot, janë po aq të rëndësishme dhe historike sa ç’ishin edhe më 1878.
Komente