LEZHE- 565 vjetori i Kuvendit të Lezhës

Është shoqëruar me një aktivitet festiv, festa ka nisur nën kolonën zanore kushtuar heroit tonë kombëtarë Gjergj Kastriot Skënderbe. Atmosfera festive ka vijuar më pas me paradën e princave shqiptarë, që imitonin ardhjen e princave në Kuvend që nga hyrja e qytetit që lidhet me sheshin tek obelisku i kuvendit.

Në përkujtim të kësaj dite të shënuar morën pjesë një sërë personalitetesh të qeverisë shqiptare, drejtues të klerik katolik e ortodoks, myslimanë, deputetë e të tjerë, të cilët kanë vënë kurora dhe tufa me lule në vende të shënuara që i referohen kësaj ngjarjeje të madhe historike.

I pranishëm në këtë aktivitet përkujtimorë historiani Kasem Biçoku, përcolli disa detaje interesante nga historia e besëlidhjes nga ky bashkim historik si dhe mbi figurën e heroit kombëtarë Skënderbeu.

Festa ka vijuar me koncertin me pjesë nga interpretime klasike dhe teatër poetik me këngëtarë dhe artistë profesionist të ftuar duke u mbyllur në fund me një ekspozitë pikture kushtuar jetës dhe veprës së heroit tonë Gjergj Kastriotit.

Ajo çka historia mban në faqet e saj është se pas fitores së madhe të vitit 1443, Skënderbeu filloi takimet me princër e fisnikë të tjerë shqiptarë për të gjetur rrugën e bashkimit. Për këtë qëllim më 2 mars të vitit 1444 në katedralen e Shënkollit të qytetit të Lezhës u mbajt i pari kuvend kombëtar.

Në këtë kuvend morën pjesë Skënderbeu, Gjergj Araniti, Andrea Topia bashkë me dy djemtë e tij, Gjergj Strazimit Balsha, Nikoll e Pal Dukagjini, Teodor Muzaka i riu si dhe disa pjestarë të tjerë të kësaj familjeje.

Lek Zaharia, Pjetër Spani bashkë me 4 djemtë e tij, Lek Dushmani, Stefan Gojcini.

Skënderbeu si drejtues i Kuvendit mbajti fjalën e hapjes në të cilën theksoi domosdoshmërinë dhe rëndësinë e bashkimit të shqiptarëve.

Kuvendi vendosi që bashkimi të bëhej në formën e një besëlidhjeje të një aleance ushtarake nëpërmjet drejtuesve të principatave dhe të krerëve të vendit, që njihet me emrin “Lidhja Shqiptare e Lezhës”. Vendimi i rëndësishëm ishte krijimi i ushtrisë së përbashkët dhe caktimi i Skënderbeut si komandat i përgjithshëm i saj.

Me vendimin e kuvendit të Lezhës u bë një hap i madh dhe vendimtarë drejt bashkimit politik të vendit dhe krijimit të një pushteti qendrorë të përfaqësuar nga Gjergj Kastriot Skënderbeu, të cilën ai e fuqizoi gjithnjë e më shumë për të bashkuar sa më organikisht shqiptarët e viseve të lira shqiptare.