REPORTAZH NGA SHTEGTIMI NË SHEJTËRIMIN E NËNËS TEREZE
Diaspora, Reportazhe | Rrezore | 09.09.16 | 20:42
Shkruan : Lekë Preçi
Kur para tre-katër muajve, u bë e ditur data e sakt se kur do të shejtërohët Nëna Tereze në Vatikan-Romë, interesimi për këtë shtegtim ishte i madh Këshilli i Famullisë sonë ishte në nivelin e duhur dhe menjëherë filloi përgatitjet për këtë shtegtim. Kaluan pushimet verore dhe çdo shtegtarë , në mendje kishte këtë shtegtim i cili pritej me pa durim.
Kështu të 66 shtegtarët u njoftuan me kohë për kohën dhe programin e shtegtimit në Vatikan me rastin e shejtërimit të Nënës Tereze. Famullia jonë Katolike Shqiptare këtu në Stuttgart mbanë me krenari emrin e të Shejtës Nëna Tereze. Për këtë arsy , për ne, rasti është më i veqant dhe domethënës. Në datën e caktuar, të premtën , me 2 shtator, në orën 17,oo, të gjithë shtegtarët ishin në vendin dhe kohën e caktuar, të gatshëm për udhëtim.
Vërehej një ndjenjë hareje e gëzimi te të gjithë shtegtarët.
Dukej qartë në sjelljet e tyre , se ishte një udhëtim i veqantë, një udhëtim dhe pjesmarrje në një ngjarje të rëndësishme dhe të madhe në të gjitha dimenzionet. Të edukuar dhe të mësuar në Epokën e Nënës Tereze, me veprat e Nënës Tereze, me humanizmin dhe dashurinë për njeriun , këta shtegtarë dalë nga dalë , me plot qanta e gjëra që nevojitën gjatë rrugës, vëndosëshin në autobusin që priste këta shtegtarë.
Po, po , e vetëkuptueshme sepse te këta udhëtarë është bërë traditë tashmë, shtegtimi. Për çdo vit shtegtojnë në Lurd, në Izrael e vënde tjera. Kanë përvojën e duhur dhe për këtë arsy i kanë plot duart me valigje , me kiste të birrave, raki, gjëra ushqimore , instrumente muzikore, flamuj kombëtar e shtetëror. Traditë dhe përvojë e krijuar.
Para nisjës, gazetari i RTK-së Halil Rrustemaj, propozon që të bëhët një fotografi e përbashkët në shenjë kujtimi nga ky shtegtim i veqantë. Për ndryshe, Halili i cili na shoqëroj gjatë gjithë kohës , është një gazetar që në mënyrë besnike përcjell dhe paraqet në RTK aktivitetet e ndryshme të mërgimtarëve. Ai ka përcjell aktivitetet dhe veprimtarinë e Misionit Katolik Shqiptar në Stuttgart qysh nga viti 1993, kur fëmijtë i tij ishin nxënës të Shkollës Shqipe . Si valltarë dhe recitues të kësaj shkolle, janë paraqit shpesh herë në programe të përbashkta kurse Halili me kamerën e tij ka shumë inçizime nga këto vite.
Nisja me kohë.
Vërehej një mungesë ! Mungonte Patër Marjani i cili gjithnjë i shoqëronte me gëzim shtegtarët. Ai tani është në detyrë të re dhe ne i dëshirojmë gjithë të mirat.
Me ne ishin Motrat Terezinë dhe Valbonë. Atmosfera e rëndomtë deri sa të kalohët trafiku i rënduar nëpër qytet. Me të hyrë në autostradën A 81 disi atmosfera u ngjall. Këtë e bëjnë të rinjtë që në numër ishin të shumtë. Ata gjithnjë dhe kudo kanë hijeshinë , kanë bukurinë, kanë humorin, kanë këngën dhe harenë.
Rinia e Famillisë sonë, gjithnjë ka me vete harenë e gëzimin. Ata janë ma të mirët në shtëpi, në shkollë, në punë e ku do. Tingujt e qiftelisë së Gasprit dhe zëri i ti melodik, të ngazllejn, të mbushin hare dhe kënaqësi.
Mjafton të filloj e pastaj i ke të gjithë një. Nuk di se si kalonin aq shpejt ato kilometra dhe ato tunele të mërzitshme të Zvicrrës aq shpejt, pa as ma të voglin shqetsim a monotoni.
Pas një nate të hareshme, në mëngjesin e së shtunës arritëm në Romë te hoteli Piccole Ancelle di Cristo Re. Vëndosja ishte e përgatitur mirë dhe për pak minuta të gjithë ishin nëpër dhomat e tyre.
Pas një pushimi të shkurtër të gjithë u nisëm në këmbë për në Sheshin e Shën Pjetrit në Vatikan. Pas një kontrollimi detal nga ana e sigurisë së Sheshit, hymë në Shesh. Një pamje impozante. Unë isha për herë të parë në këtë vend.
Sa e sa herë kemi lexuar nëpër libra dhe literaturë të ndryshme për këtë vënd të vogël por shumë të rëndësishëm për historinë botërore por edhe për historinë e popullit tonë shqiptar. Ne shqiptarët , që nga kohët e lashta, këtu e kemi historinë.
Impresive dhe mahnitëse ishin vizitat në Bazilikën e Shën Pjetrit.
Ajo arqitekturë precize qysh nga kohët e lashta, ato vizatime mahnitëse ku vetë dora e Mikelo Angjelos kishte projektuar e Leonardo da Vinçit kishte vizatuar. E pa përshkrueshme !
Dreka në hotel ishte e mirë, e qetë, shërbimi shumë korrekt. Biseda të pa fundme rreth përshtypjeve të udhëtimit e vizitës në Sheshin Shen Pjetri etj.
Në mbrëmje do të marrim pjesë në koncertin e përgatitur nga Ipeshkvnia e Kosovës në bashkpunim me Filharmoninë e Kosovës. Koncerti u mbajt në Kishën e Shën Palit. Një gjë është interesante. Kjo Kishë ishte e mahnitshme, impozante por që nuk është në kompleksin e Vitikanit.
Është në qytetin e Romës. Një numër i madh i vizitorëve nga të gjitha anët e botës. Një prezentim i shkëlqyeshëm i Yjeve tona në arenën artistike. Përfaqësues eminent nga jeta politike, artistike, sportive etj.
Ambienti ishte shumë i madh , kështu që zërimi dhe mundësitë tjera teknike nuk ofruan mundësi që të gjithë të pranishmit të kishin qasje në këtë koncert.
Të nesërmën, e diel, me 4 gusht 2016, herët në mëngjes, si dukej e të gjitha rrugët e Romës të qonin në Vatikan, në Sheshin e Shën Pjetrit.
Një dyndje e madhe e shtegtarëve nga të gjitha anët e botës për të marrë pjesë në Shejtërimin e Nënës Tereze. Edhe ne , shtegtarët e Famullisë Katolike Shqiptare e Shejta Nëna Tereze në Stuttgart, bashkarisht ishim prezent në këtë ngjarje të rëndësishme e cila përseritet shumë, shumë rrallë, me qindvjetsha. Mesha solemne filloj në orën 10.30 minuta e udhëhequr nga Papa Franqesku.
U lexua një historik i shkurt i jetës dhe veprës së Nënës Tereze dhe pastaj u zbulua fotografia zyrtare e SHEJTËS NËNA TEREZE. Me këtë akt solemn edhe zyrtarish Nëna Tereze u shpall e SHEJTE.
Ne shqiptarët mburremi dhe jemi krenar që bota përëndimore po na i pranon dhe çmon vlerat. Mburremi dhe jemi krenar me Bijën tonë e cila u lind dhe e rriti shtatin në truallin arbëror.
Patëm kohë të lirë në atë pasdite dhe atë e shfrytëzuam për shëtitje dhe freskim në atë vapë të madhe, nëpër rrugët e sheshet e Vatikanit, nëpër shitorët e restoranët e shumtë.
Nisja ishte planifikuar në orën 17.oo të asaj të diele të datës 4 gusht 2016 për në Stuttgart. Nisja me kohë, të gëzuar, të hareshëm, me plot përshtypje të mira, mbreslënëse, me plot fotografi të ndryshme në telefona e aparate fotografike. Dhe si gjithnjë në këso raste, rapsodi ynë Gaspri i kishte vu rend për rend të gjitha ngjarjët interesante për ti paraqit shumë, shumë bukur përmes telave të qiftelisë. Kështu, duke krijuar një atmosferë të hareshme deri në orët e vona.
Të nesërmën , aty nga ora 7 e mëngjesit, arritëm në Stuttgart për tu shpërnda me përshtypjet ma të mira nga ky shtegtim, me përshëndetjet për një javë të mirë e të mbarë.
Eca, eca , pak shkrova !
Shtutgart,
shtator 2016
Foto nga Vilson Markaj dhe Halil Rrustemaj.
Komente