Edhe në këtë dhjetor
Këndi poetik, Rrezore | Engjëll I. Berisha | 28.12.14 | 21:22
Engjëll I. Berisha
EDHE NË KËTË DHJETOR
Krejt çka shkruan dora ime e dridhur
e nxora nga herbariumi
ujë të pi fjala ime thashë
si lulja në saksi
rrëfimin mesditë prej shtëpisë
prej nga e shoh të frikshëm atdheun
me zjarrmi
edhe sot fjalët i shqiptojë në vetmi
vjeshtë bën disponimi im
kotësia e kujtimit heshtur
riprodhon dhembjen shpërfytyruar
kush do ta thoshte se do ta ç’veshim
edhe njëherë vendin
ta shohim të zbrazur
dita me bërtitmë e lodhur rri në këmbë
fjala e grisur si në këngë folklorike
rrahin kambanarët
shenja që Zoti pikëllohet për të dashurit
zemër e zbrazur
a më zë mëkati i huaj
i kaltër qielli e verdhë është shpresa
e errët e kaluara e jonë e fjalëve
ku është dashuria e pastër dashuria Atdhe
me çka ti hapim muret
si të dalim nga shtrati i ftohtë
pa mbulesë
poetët e bëjnë Atdheun
e ruajnë si zogun në kuvli
kush ia mohon të kaluarës sime shumësinë
netët me laps në dorë
me ngjyrat që piknin në fletë si lot
dimrin e vetmisë
mbi mal ku e zinte bora borën
dhe lumin e kapërcenim në këmbë
kush e ndanë botën dashurinë
gjarpri i shkretëtirës i zi i etur
aq e rëndë barra
emri në letër e rrëfen historinë
deri në këtë stinë të pranverës sime
Edhe në këtë dhjetor dymijë e katërmbëdhjetë
unë eci këmbë ëndrrës
shpresa andej në heshtje jeton.
…….dhjetor 2014.
Engjëll I. Berisha
Komente